१४ वैशाख, काठमाडौं । ठूलो भर्याङस्थित यातायात व्यवस्था कार्यालयले सेवाग्राहीलाई अनावश्यक रूपमा बिहान सबेरैदेखि लाइनमा बस्न नआउन औपचारिक रूपमा आग्रह गरेको छ। कार्यालयले सार्वजनिक सूचना जारी गर्दै सेवा बिहान ९ बजेदेखि नियमित रूपमा सञ्चालन हुने स्पष्ट पार्दै केही सेवाग्राहीहरू ७–८ बजेदेखि नै उपस्थित भई लाइन बस्ने प्रवृत्तिप्रति ध्यानाकर्षण गराएको हो।
कार्यालयका अनुसार हालको कार्यप्रवाह र सेवा व्यवस्थापन प्रभावकारी रहेकाले बिहानैदेखि लामो समय लाइन बस्नुपर्ने अवस्था नरहेको जनाएको छ। दैनिक रूपमा सेवाग्राहीको काम करिब दिउँसो १ बजेसम्म सम्पन्न भई त्यसपछि सेवा चाप उल्लेखनीय रूपमा घट्ने गरेको कार्यालयको भनाइ छ। सोमबारका दिन तुलनात्मक रूपमा केही बढी भीड हुने भए पनि अन्य दिनहरूमा सेवा सहज र व्यवस्थित रूपमा उपलब्ध रहेको उल्लेख गरिएको छ।
त्यसैगरी, बैंकिङ सेवा दिउँसो ४ बजेसम्म तथा कार्यालय सेवा साँझ ५ बजेसम्म सञ्चालन हुने भएकाले सेवाग्राहीलाई आफ्नो समय व्यवस्थापन गरी भीडभाड कम हुने समयमा उपस्थित भई सेवा लिन कार्यालयले अनुरोध गरेको छ। अनावश्यक भीड नियन्त्रण तथा सेवा प्रवाहलाई थप व्यवस्थित बनाउन सबै सेवाग्राहीको सहकार्य अपेक्षित रहेको कार्यालयले जनाएको छ।
