टोकियो — जापानको उत्तरी टापु होक्काइडोमा सोमबार बिहान ६.२ म्याग्निच्युडको शक्तिशाली भूकम्प गएको छ। पछिल्ला दिनहरूमा बढ्दो भूकम्पीय गतिविधिको शृङ्खलाबीच आएको यस कम्पनले थप झट्काको सम्भावना रहेको भन्दै अधिकारीहरूले उच्च सतर्कता अपनाउन आग्रह गरेका छन्।
जापानी मौसम विज्ञान एजेन्सी (जेएमए) का अनुसार भूकम्प स्थानीय समयअनुसार बिहान ५:२३ बजे होक्काइडोको दक्षिणी क्षेत्र केन्द्रबिन्दु भएर गएको हो। भूकम्पको गहिराइ करिब ८३ किलोमिटर मापन गरिएको छ भने प्रारम्भिक ६.१ म्याग्निच्युड अनुमानलाई संशोधन गर्दै ६.२ कायम गरिएको हो।
भूकम्पपछि कुनै सुनामी चेतावनी जारी नगरिएको भए पनि विभिन्न क्षेत्रमा शक्तिशाली कम्पन महसुस गरिएको थियो। अमेरिकी भूगर्भीय सर्वेक्षण (USGS) ले जनघनत्व कम भएको क्षेत्रमा केन्द्रित भएकाले ठूलो क्षतिको सम्भावना न्यून रहेको प्रारम्भिक मूल्यांकन गरेको छ। यद्यपि, चट्टान खस्ने र पहिरो जाने जोखिम भने कायमै रहेको बताइएको छ।
जेएमएले आगामी दिनमा समान वा अझ ठूला भूकम्प आउन सक्ने सम्भावना रहेको उल्लेख गर्दै स्थानीय बासिन्दालाई सावधानी अपनाउन आग्रह गरेको छ। यसअघि पनि केही घण्टा अगाडि मात्र ५.० म्याग्निच्युडको भूकम्प समुद्री क्षेत्रमा गएको थियो, जसले क्षेत्रको भूकम्पीय गतिविधि निरन्तर सक्रिय रहेको देखाएको छ।
जापान प्रशान्त महासागरको ‘रिङ अफ फायर’ क्षेत्रमा पर्ने भएकाले विश्वकै अत्यधिक भूकम्पीय जोखिमयुक्त देशमध्ये एक मानिन्छ, जहाँ वर्षेनी हजारौं भूकम्प रेकर्ड हुने गर्छन्।
सम्बन्धित खवर
