जकार्ता — इन्डोनेसियाको पश्चिम जाभा प्रान्तस्थित बेकासी क्षेत्रमा दुई यात्रुवाहक रेल एकआपसमा ठोक्किँदा कम्तीमा १४ जनाको मृत्यु भएको छ भने ८४ जना घाइते भएका छन्। मंगलबार सार्वजनिक गरिएको विवरणअनुसार दुर्घटना अत्यन्त गम्भीर रहेको जनाइएको छ।
दुर्घटनापछि राष्ट्रपति प्रबोवो सुबिआन्तो स्वयं अस्पताल पुगेर घाइतेहरूको अवस्थाबारे जानकारी लिँदै पीडित परिवारप्रति गहिरो समवेदना व्यक्त गरेका छन्। उनले घटनाको यथार्थ कारण पत्ता लगाउन उच्चस्तरीय अनुसन्धान गरिने प्रतिबद्धता जनाएका छन्।
रेल सञ्चालन कम्पनी केएआईका अध्यक्ष निर्देशक बबी रेसिडिनले मृतकको संख्या पुष्टि गर्दै शवहरू पहिचानका लागि प्रहरी अस्पतालमा राखिएको जानकारी दिएका छन्। घाइतेहरूलाई नजिकका विभिन्न अस्पतालमा उपचारका लागि भर्ना गरिएको छ, केहीको अवस्था गम्भीर रहेको बताइएको छ।
स्थानीय समयअनुसार साँझ करिब ८:५० बजे जकार्ता–बेकासी रेलमार्गमा सञ्चालनमा रहेका दुई लामो दूरीका रेल एकआपसमा ठोक्किँदा दुर्घटना भएको प्रारम्भिक विवरणमा उल्लेख गरिएको छ।
घटनाको कारणबारे विस्तृत अनुसन्धान गर्न रेल प्राधिकरण तथा राष्ट्रिय यातायात सुरक्षा समितिले संयुक्त रूपमा छानबिन सुरु गरेको छ। अधिकारीहरूले सुरक्षा मापदण्डको पालना तथा प्राविधिक पक्षहरूको समेत परीक्षण गरिने बताएका छन्।
सम्बन्धित खवर
