२७ वैशाख, काठमाडौं । पूर्वप्रधानमन्त्री तथा नेपाली कांग्रेसका पूर्वसभापति Sher Bahadur Deuba र उनकी पत्नी, पूर्वपरराष्ट्र मन्त्री Arzu Rana Deuba विरुद्ध रेड नोटिस जारी गराउने प्रक्रिया तीव्र पारिएको छ । अन्तर्राष्ट्रिय प्रहरी संगठन INTERPOL ले थप प्रमाण र कानुनी कागजात माग गरेपछि नेपाल प्रहरीअन्तर्गतको एनसीबीले आवश्यक विवरण पठाइसकेको प्रहरी स्रोतले जनाएको छ । प्रहरी प्रधान कार्यालय स्रोतका अनुसार केही दिनअघि इमेलमार्फत थप कागजात माग भएपछि त्यसअनुसारका प्रमाण तथा विवरण पुनः पठाइएको हो ।
यसअघि गत २४ चैतमा काठमाडौं जिल्ला अदालतले देउवा दम्पतीविरुद्ध पक्राउ पुर्जी जारी गरेको थियो । सम्पत्ति शुद्धीकरण अनुसन्धान विभागको सिफारिसका आधारमा अदालतले पक्राउ अनुमति दिएपछि उनीहरूलाई नेपाल ल्याउने कानुनी तथा कूटनीतिक प्रक्रिया अगाडि बढाइएको थियो । त्यसकै निरन्तरतास्वरूप रेड नोटिस जारीका लागि एनसीबीले औपचारिक पत्राचार इन्टरपोलमा पठाएको हो । तर आवश्यक कागजात अपुग रहेको भन्दै इन्टरपोलले तत्काल नोटिस जारी नगरी थप विवरण मागेको बताइएको छ ।
पक्राउ पुर्जी जारी हुँदासम्म देउवा दम्पती नेपालबाहिर थिए । १४ फागुनमा उपचारको बहानामा सिंगापुर प्रस्थान गरेका उनीहरू पछि हङकङ पुगेको स्रोतको दाबी छ । त्यसयता उनीहरू स्वदेश नफर्किएको र हाल पनि हङकङमै रहेको आशंका गरिएको छ । यसअघि पनि जेनजी आन्दोलनपछिको तनावपूर्ण राजनीतिक अवस्थापछि उपचारकै नाममा उनीहरू विदेश गएका थिए, तर त्यो भ्रमणपछि नेपाल फर्किएका थिए । यसपटक भने लामो समयसम्म उनीहरू विदेशमै रहनुले विभिन्न राजनीतिक तथा कानुनी प्रश्न उठाएको छ ।
यदि इन्टरपोलमार्फत रेड नोटिस जारी भयो भने संसारभरका १९६ सदस्य राष्ट्रका सुरक्षा निकायले देउवा दम्पतीलाई पक्राउ गर्न सक्नेछन् । त्यसपछि कानुनी प्रक्रिया पूरा गरी उनीहरूलाई नेपाल फिर्ता ल्याउने बाटो खुल्नेछ । यो घटनाक्रमले नेपाली राजनीतिमा नयाँ तरंग सिर्जना गरेको छ भने उच्च तहका राजनीतिक नेतृत्वमाथि कानुनी कारबाहीको बहसलाई पनि थप चर्काएको छ ।
सम्बन्धित खवर
