वासिङ्टन डीसी — अमेरिकाको राष्ट्रपति भवन ह्वाइट हाउस नजिकै रहेको सुरक्षा जाँच चौकीमा गोली चलाउने एक बन्दुकधारी सुरक्षाकर्मीको जवाफी कारबाहीमा मारिएका छन्। घटनापछि वासिङ्टन डीसी क्षेत्रमा उच्च सतर्कता अपनाइएको छ भने सुरक्षालाई थप कडा बनाइएको छ।
अमेरिकी राष्ट्रपतिको सुरक्षा जिम्मेवारी सम्हाल्ने संघीय निकाय ‘सिक्रेट सर्भिस’ का अधिकारीहरूले उक्त बन्दुकधारीलाई नियन्त्रण गर्ने क्रममा गोली प्रहार गरिएको पुष्टि गरेका छन्। अन्तर्राष्ट्रिय सञ्चारमाध्यम अलजजिराका अनुसार, गोली लागेर घाइते भएका ती व्यक्तिलाई तत्कालै नजिकैको अस्पताल लगिएको थियो, तर चिकित्सकहरूले उनलाई मृत घोषणा गरेका हुन्।
उक्त घटनामा एक जना सर्वसाधारण पनि घाइते भएको बताइएको छ। तर घाइते व्यक्ति प्रारम्भिक गोली प्रहारबाट घाइते भएका हुन् वा त्यसपछि भएको सम्भावित दोहोरो गोली हानाहानमा परेका हुन् भन्ने विषय अझै स्पष्ट भइसकेको छैन। सुरक्षाकर्मीहरूले घटनाबारे विस्तृत अनुसन्धान जारी राखेको जनाइएको छ।
सिक्रेट सर्भिसका अनुसार, प्रारम्भिक अनुसन्धानले देखाएको छ कि ती संदिग्ध व्यक्तिले हतियार झोलाभित्र लुकाएर सुरक्षा जाँच चौकीसम्म ल्याएका थिए। त्यसपछि उनले अचानक झोलाबाट हतियार निकालेर त्यहाँ खटिएका सुरक्षाकर्मीमाथि गोली चलाउन थालेका थिए।
अमेरिकी समयअनुसार शनिबार साँझ करिब ६ बजे वासिङ्टन डीसीस्थित १७औं स्ट्रिट र पेन्सिल्भेनिया एभेन्यूको चोकमा रहेको सुरक्षा जाँच चौकीमा यो घटना भएको हो। घटनास्थल राष्ट्रपति भवन ह्वाइट हाउस नजिकै पर्ने भएकाले तत्कालै आपतकालीन सुरक्षा व्यवस्था सक्रिय पारिएको थियो।
घटनाका बेला अमेरिकी राष्ट्रपति डोनाल्ड ट्रम्प ह्वाइट हाउसभित्रै रहेका थिए। उनी पूर्ण रूपमा सुरक्षित रहेको र कुनै खतरा नभएको पुष्टि गरिएको छ। घटनापछि ह्वाइट हाउस परिसर र आसपासको क्षेत्रमा तुरुन्तै ‘लकडाउन’ गरिएको थियो र आवागमन नियन्त्रणमा लिइएको थियो।
सिक्रेट सर्भिसका अधिकारीहरूले स्पष्ट पारेका छन् कि घटनामा उनीहरूका कुनै पनि कर्मचारी घाइते भएका छैनन्। हाल घटनाको पृष्ठभूमि, आक्रमणको उद्देश्य र संदिग्धको पहिचानबारे विस्तृत अनुसन्धान जारी रहेको जनाइएको छ।
सम्बन्धित खवर
