काठमाडौं । स्वाभिमान लघुवित्त वित्तीय संस्था लिमिटेड ले गत आर्थिक वर्षको नाफाबाट आफ्ना शेयरधनीलाई वितरण गर्ने भनिएको लाभांश संशोधन गर्दै अब कुनै पनि लाभांश वितरण नगर्ने निर्णय गरेको छ । यसअघि प्रस्ताव गरिएको बोनस शेयर तथा नगद लाभांश दुवै रद्द गरिएको कम्पनीले जनाएको हो ।
लघुवित्तको सञ्चालक समितिको जेठ ८ गते बसेको बैठकले यसअघि गरिएको लाभांश प्रस्ताव परिमार्जन गर्दै हालको आर्थिक तथा नियामकीय अवस्थालाई मध्यनजर गरी लाभांश वितरण नगर्ने निर्णय गरेको जनाएको छ । कम्पनीले उक्त निर्णयबारे नियामक निकाय तथा लगानीकर्तालाई औपचारिक जानकारी गराइसकेको छ ।
यसअघि गत फागुन १५ गते बसेको सञ्चालक समितिको बैठकले आर्थिक वर्षको सञ्चित मुनाफाबाट चुक्ता पूँजीको ९.५ प्रतिशत बोनस शेयर र कर प्रयोजनसहित ०.५० प्रतिशत नगद लाभांश गरी कुल १० प्रतिशत लाभांश वितरण गर्ने निर्णय गरेको थियो । उक्त प्रस्ताव स्वीकृतिका लागि नेपाल राष्ट्र बैंकसमक्ष पठाइएको थियो ।
तर, पछिल्ला महिनाहरूमा संस्थाको वित्तीय अवस्था, पूँजी पर्याप्तता, कर्जा जोखिम, नियामकीय व्यवस्था तथा वित्तीय सूचकहरूमा देखिएको दबाबका कारण प्रस्तावित लाभांश कायम राख्न कठिन भएको संस्थाले जनाएको छ । विशेषगरी नेपाल राष्ट्र बैंकले लघुवित्त संस्थाहरूको पूँजी कोष, खराब कर्जा व्यवस्थापन, प्रोभिजनिङ तथा वित्तीय अनुशासनमा कडाइ गरेपछि धेरै लघुवित्त संस्थाहरू दबाबमा परिरहेका छन् ।
संस्थाले वित्तीय सुदृढीकरणलाई प्राथमिकतामा राख्दै तत्काल लाभांश वितरणभन्दा आन्तरिक पूँजी मजबुत बनाउने रणनीति अपनाएको बुझिएको छ । यस निर्णयसँगै लाभांशको अपेक्षा गरेका शेयरधनीहरू भने निराश बनेका छन् । पछिल्लो समय शेयर बजारमा पनि लघुवित्त कम्पनीहरूको नाफा घट्ने, निष्क्रिय कर्जा बढ्ने तथा नियामकीय कडाइका कारण लगानीकर्ताको आकर्षण केही घट्दै गएको देखिन्छ ।
वित्तीय क्षेत्रका जानकारहरूका अनुसार पछिल्ला वर्षहरूमा लघुवित्त संस्थाहरूमा कर्जा असुली चुनौती, दोहोरो कर्जा समस्या, ग्रामीण क्षेत्रमा आर्थिक गतिविधिमा सुस्तता तथा ऋणीहरूको भुक्तानी क्षमतामा आएको कमजोरीका कारण धेरै संस्था दबाबमा छन् । यस्तो अवस्थामा लाभांश वितरण नगरी पूँजी जोगाउने निर्णयलाई केहीले दीर्घकालीन स्थायित्वका लागि आवश्यक कदमको रूपमा समेत हेरेका छन् ।
यद्यपि, अन्तिम निर्णय भने आगामी वार्षिक साधारणसभाबाट अनुमोदन भएपछि मात्रै कार्यान्वयनमा आउनेछ । कम्पनीले आगामी दिनमा वित्तीय अवस्था सुधार गर्दै लगानीकर्ताको विश्वास कायम राख्ने प्रतिबद्धता व्यक्त गरेको छ ।
सम्बन्धित खवर
