२० जेठ, काठमाडौं । मलेसियामा जारी एसीसी महिला प्रिमियर कपमा नेपालले सशक्त प्रदर्शन गर्दै विजयी सुरुवात गरेको छ । बुधबार सम्पन्न आफ्नो पहिलो खेलमा नेपालले कतारलाई ८ विकेटले पराजित गर्दै प्रतियोगितामा सुखद सुरुवात गरेको हो ।
कतारले प्रस्तुत गरेको ७७ रनको सामान्य लक्ष्य नेपालले मात्र १०.५ ओभरमा २ विकेट गुमाएर पूरा गर्यो । सहज लक्ष्य पछ्याउने क्रममा नेपाली ब्याटरहरूले संयमित र आक्रामक दुवै शैली अपनाउँदै खेल आफ्नो पक्षमा पारेका थिए ।
नेपालका लागि ओपनर बिन्दु रावलले सर्वाधिक ३३ रनको योगदान दिइन् । उनले इनिङ्सको सुरुवातदेखि नै आत्मविश्वासपूर्ण ब्याटिङ गर्दै टोलीलाई मजबुत आधार प्रदान गरिन् । यस्तै पूजा महतोले अविजित २८ रन बनाउँदै अन्त्यसम्म क्रिजमा टिकेर टोलीलाई जितसम्म पुर्याइन् । कप्तान इन्दु बर्मा ६ रनमा अविजित रहँदै जितको औपचारिकता पूरा गर्न सफल भइन् ।
कतारका तर्फबाट शाहरीनवाब खान र खादिजा अमदले समान एक–एक विकेट हात पारे पनि नेपाली ब्याटरहरूको लय रोक्न सकेनन् ।
यसअघि टस हारेर पहिले ब्याटिङ गर्न बाध्य भएको कतारको टोली नेपाली बलरहरूको कसिलो प्रदर्शनका कारण ठूलो स्कोर बनाउन असफल रह्यो । कतार १६.५ ओभरमा सबै विकेट गुमाउँदै ७६ रनमा समेटिएको थियो ।
कतारका लागि ओपनर गेटरुडे चन्दिरुले सर्वाधिक २५ रन बनाइन् भने टोलीकी कप्तान आइशाले १० रनको योगदान दिइन् । अन्य ब्याटरहरू नेपाली बलिङ आक्रमण र फिल्डिङ दबाबका कारण ठूलो इनिङ्स खेल्न असफल भए ।
नेपालका लागि अनुभवी खेलाडी रुबिना क्षेत्रीले उत्कृष्ट बलिङ गर्दै ३ विकेट लिइन् । यस्तै कविता कुँवर, पूजा महतो र रिया शर्माले समान एक–एक विकेट हात पार्दै कतारलाई दबाबमा राखे । नेपाली टोलीको चुस्त फिल्डिङ पनि जितको महत्वपूर्ण आधार बन्यो, जहाँ कतारका ४ ब्याटर रनआउट भएका थिए । रनआउटमार्फत विपक्षी टोलीलाई थप क्षति पुर्याउँदै नेपालले खेलमाथि सुरुदेखि नै नियन्त्रण कायम राखेको थियो ।
यस जितसँगै नेपालले प्रतियोगितामा महत्वपूर्ण दुई अंक जोडेको छ र आगामी खेलहरूका लागि आत्मविश्वास समेत बढाएको छ । नेपाली टोलीले अब बिहीबार आफ्नो दोस्रो खेलमा भुटानको सामना गर्नेछ । लगातार दोस्रो जित निकाल्दै समूह चरणमा आफ्नो स्थिति अझ मजबुत बनाउने लक्ष्यसहित नेपाल मैदानमा उत्रिनेछ ।
सम्बन्धित खवर
